නිදහස් දා රාත‍්‍රියේ මිතුරන් තිදෙනෙකු එක්ව මධුවිතෙන් සප්පායම් වූයේ පොලොන්නරුවේ ප‍්‍රකට වැව් තෙරක් අසලය. එය නිම වනවාත් සමගම එම තිදෙනා තීරණය කළේ වැවට බැස හොඳ හැටි දිය නෑමටය. මේ වනවිට වේලාව ද රාත‍්‍රී 9 ඉක්මවා තිබුණි.
ඊළඟ ගැටලූව වූයේ නෑමට සබන් නැතිකමය. අධික වෙරිමතින් සිටි එකමිතුරකු වැව් ඉවුරේ නතර කර ඉතිරි දෙදෙනා ගියේ සබන් කැල්ලක් අරන් අපි ඉක්මනට එනතුරු ඔතන හිටපං යැයි මිතුරාට අවවාද කරමිනි. සබන් ගේනතුරු බලා ඉන්න බැරිව වැව ඉවුරේ සිටි මිතුරා දියට පැන්නේ නා ගැනීමට විය හැකිය.
මද වේලාවකින් සබන් රැගෙන ආ මිතුරෝ දෙදෙනා සිය මිතුරාට කථා කළේය. පිළිතුරක් නොලැබිණි. වටපිටාවෙහි සොයා බැලූ නමුදු හෝඩුවාවක් ද නැත. දෙමිතුරන්ට තරු පෙනුණි. කෑගසා අහල පහල අය ද කැඳවාගෙන සොයා බැලූ නමුදු ඔහු සොයා ගැනීමට නොහැකිවිය.
දිය නෑමට ගිය අයෙකු අතුරුදන්වීම ගැන පුවතක් ඇසිල්ලකින් දස අතම පැතිර ගියේය.
මේ පිළිබඳව පොලිසියට දැනුම් දීමෙන් පසුව පොලිස් කිමිදුම්කරුවෝද යොදා සෙවූ නමුත් දියේ අතුරුදන් පුද්ගලයා හමුවූයේ නැත. ඥාති මිතුරෝ ද දැඩි ලෙස කම්පාවෙන් පසුවෙද්දී වැව මැද පිහිටි දුපතක යමකු ඉන්නා බවට තොරතුරක් ආවේය.
ඔරුවක නැගි පිරිසක් එම දූපත කරා ගොස් පසුව සොයා බැලීමේදී හෙළිවූයේ දෙමිතුරන් සබන් ගෙන එන්නට කඩයට ගිය අතර දිය නෑමට පැන්න පුද්ගලයා පිහිනා ගොස් දූපතට ගොඩවී පසුදා පහන්වනතුරු හොඳහැටි නිදාගෙන ඇති බවයි.
මෙම සිද්ධිය වාර්තා වූයේ පොලොන්නරුව ප‍්‍රදේශයෙනි.
0 comments:
Post a Comment